NORD6210 Norwegian 2 level 1-7, Subject 1 Course description

Emne 1 ligg i haustsemesteret og har avsluttande munnleg eksamen før jul. Studentane har arbeidskrav som føreset arbeid i eigne grunnskuleklassar.

Etter fullført emne har studenten følgjande læringsutbyte definert som kunnskap, dugleik og generell kompetanse:Kunnskap

Studenten

• har omfattande kunnskap om språkleg variasjon og norsk som første- og andrespråk
• har kunnskapar om språkhistorie, språklege endringsprosessar i eldre og nyare tid og gjeldande normering av nynorsk og bokmål
• har kunnskapar om litteraturhistorie og brei kunnskap om skjønnlitteratur frå ulike tider, for barn, unge og vaksne
• har kunnskapar om kva for funksjonar skriving har hatt og har i kulturen vår
• har utvida kunnskapar om skriftlege sjangrar og innsikt i korleis elevar frå 1. til 7. trinn utviklar kunnskapar om desse og kan nytte dei i eige tekstarbeid
• har inngåande kjennskap til teoriar om skriving og skriveopplæring, også for elevar med norsk som andrespråk
• har kunnskapar om sentrale verk i norsk fiksjonslitteratur og sakprosa
• har kunnskap om barnelitteraturhistorie og skjønnlitterære klassikarar for barn
• har kunnskap om skjønnlitterære klassikarar for vaksne og adaptasjon av desse for barn
• har kunnskap om adaptasjon og remediering av klassikarar for barn, ungdom og vaksne

Dugleik

Studenten

• kan bruke grammatikk- og språkkunnskap, tekst- og litteraturkunnskap i analyse av munnlege, skriftlege og multimodale tekstar
• kan gje tilpassa opplæring for andrespråkselevar med varierande ferdigheiter i munnleg og skriftleg norsk
• kan legge til rette for variert arbeid med skjønnlitteratur og sakprega tekstar i tradisjonelle og moderne medium
• kan organisere og drive tilpassa skriveopplæring for 1. til 7. trinn etter fagleg grunngitte prinsipp, også for elevar med norsk som andrespråk
• kan bruke språk- og tekstkunnskap aktivt i rettleiing av elevar i skriveprosessen
• kan rettleie i arbeidet med tekstar slik at elevane kan utvikle seg sjølve, skaffe seg kunnskapar og førebu seg for aktiv deltaking i offentlege rom og samfunnet som eit heile
• kan samanlikne tekstar skrivne for barn med omsyn til innhald, form og funksjon
• kan setje sentrale norske tekstar inn i ein historisk samanheng, tolke dei og sjå dei i lys av nordisk og annan internasjonal litteratur
• kan utføre litterær analyse

Generell kompetanse

Studenten

• har innsikt i skulefagets historie og eigenart som språk-, kultur-, litteratur- og danningsfag
• kan formidle fagstoff om språk, litteratur, tekstar og medium i relevante uttrykksformer
• har innsikt i norskfaget ut frå forsking og i høve til fagets historie og kan reflektere kritisk og konstruktivt ut frå eit historisk perspektiv på faget

Emne 1 gjev brei kunnskap om literacy (tekstkompetanse) generelt og elevtekstar spesielt, både når det gjeld elevane si forståing av tekst og elevane sin eigen skapande produksjon av munnlege, skriftlege og samansette tekstar. Studentane vil få fordjupa kunnskap om eldre og nyare barne- og ungdomslitteratur, både skjønnlitteratur og sakprosa, på norsk, dansk og svensk og i omsetjing frå samisk, og om valg av litteratur og arbeidsmåtar. I tråd med det nye læreplanverket, vil studiet vektleggje djupnelæring, tekst i kontekst og dei fagovergripande tema som folkehelse og livsmeistring, demokrati og medborgarskap og berekraftig utvikling. I undervisninga vil det bli lagt vekt på å utvikle kunnskap og ferdigheiter som rustar studentane til å bruke kreative og utforskande arbeidsmåtar i norskfaget.

Faglege hovudemne

• Norsk som identitets- og danningsfag
• Litteratur, særleg barne- og ungdomslitteratur
• Barnelitteraturhistorie
• Skjønnlitterære klassikarar for barn, ungdom og vaksne
• Adaptasjon og remediering
• Skriving normering/valfridom og vurdering
• Elevane si skapande tekstproduksjon
• Språk og identitet
• Språkhistorie
• Språkleg variasjon og talemålskunnskap

Emne 2 ligg i vårsemesteret og har avsluttande eksamen før sommaren. Emne 2 byggjer på emne 1. Arbeidskrav og eksamen i emne 1 må vere bestått før studentar kan ta eksamen i emne 2.

Etter fullført emne har studenten følgjande læringsutbyte definert som kunnskap, dugleik og generell kompetanse:

Kunnskap

Studenten

• har brei kunnskap om litteraturdidaktiske tilnærmingar og kunnskap om ulike litteraturteoretiske perspektiv
• har omfattande kunnskap om munnleg kommunikasjon, begynnaropplæringa og den vidare opplæringa i lesing og skriving
• har inngåande kjennskap til teoriar om lesing og leseforståing, særleg knytt til den andre leseopplæringa
• har kunnskap om kva funksjonar lesing har og har hatt i kulturen vår
• har utvida kunnskapar om munnnlege sjangrar og innsikt i korleis elevar frå 1. til 7. trinn utviklar kunnskapar om desse og kan nytte dei i eige arbeid
• har kunnskap om kva som kjenneteiknar språkleg kommunikasjon i ulike medium
• har kjennskap til teoriar om samansette tekstar
• har kunnskap om samtidslitteratur for barn og unge og barnelitteraturteori
• har kunnskap om samspelet mellom tekst og bilde i bildebøker, teikneseriar og film
• har kunnskap om bildebokteori og bildebokanalyse
• har kunnskap om leselyst og lesemotivasjon og tilpassa opplæring i leseopplæringa

Dugleik

Studenten

• kan bruke relevante metodar og ny teknologi på måtar som fremjar samarbeid og fagleg progresjon i begynnaropplæringa og den vidare lese- og skriveopplæringa
• kan legge til rette for at elevar på trinn 1-7 lærer å lese, skrive og diskutere saktekstar og skjønnlitterære tekstar i ulike sjangrar og medium
• kan skrive akademiske fagtekstar
• kan organisere og drive tilpassa leseopplæring etter fagleg grunngitte prinsipp, også for elevar med norsk som andrespråk og elevar med lese- og skrivavansker
• kan organisere og drive tilpassa norskopplæring for alle elevar
• kan vurdere og reflektere omkring ulike slags prøver i lesing og nytte resultatet av dei til fagleg utvikling for elevane
• kan leggje til rette for den munnlege språkutviklinga til elevane
• kan lese, analysere, tolke og vurdere samansette tekstar og setje dei inn i ein større kulturell og offentleg samanheng

Generell kompetanse

Studenten

• kjenner til norskdidaktisk forsking og utviklingsarbeid og kan drøfte forskingsetiske problemstillingar
• kan planlegge, gjennomføre og vurdere fagleg og tverrfagleg utviklingsarbeid på trinn 1-7 i samarbeid med andre
• kan vurdere eigen praksis som norsklærar og grunngi vurderingane
• har eit medvite forhold til korleis samtalen mellom lærar og elevar, og samtalen elevane imellom, kan fungere som reiskap for læring
• er stødig i skriftleg bokmål og nynorsk

Følgjande arbeidskrav må vere godkjende før studentane kan gå opp til eksamen i emne 2:

Adaptasjon med munnleg forteljing av klassiske verk for vaksne, tilpassa elevar på barnetrinnet. Gruppevis arbeid med adaptasjonen, som gjennomførast individuelt i eigen klasse. Opplegget skal presenterast i eige kollegium. Innlevering av adaptasjonen som Word-dokument i høgskulens digitale læringsplattform. Målform tilpassa forteljinga.

Utforming av informasjon til føresette om fagleg emne etter nærare retningslinjer i undervisningsplanane levert som Word-dokument. Omfang om lag 800 ord. Individuelt arbeid, respons og felles publisering. Målform: nynorsk.

Eksamen er skriftleg dokumentasjon av eit sjølvvalt forskings- og utviklingsarbeid (FoU-arbeid) som studenten skal planleggje og gjennomføre i vårsemesteret med basis i eigne erfaringar og relevant teori. Omfang: om lag 5000 ord. Målform: bokmål. Nærare retningsliner i undervisningsplanen. Dato for innlevering av eksamen er i mai/juni.

Ny/utsett eksamen

Ny og utsett eksamen blir arrangert på same måte som ordinær eksamen. Ved første ny og utsett eksamen kan det leverast ein omarbeidd versjon av ordinær eksamen (sjølvvalt forskings- og utviklingsarbeid). Ved seinare forsøk må nytt sjølvvalt forskings- og utviklingsarbeid leverast. Det blir ikkje gitt ny rettleiing frå lærar.

Det blir nytta graderte karakterar A-F. Sjå forklaringar om graderte karakterar i programplanen.

Det blir nytta intern sensor. Ekstern sensor tar stikkprøver av eksamenssvara sensurert av intern sensor. Samsensur dannar grunnlaget for den øvrige karaktersettinga.